...daga alk'alamin Muhammad Tajajjini d'an Tijjani
1.
Haiku fa na da
dokoki da ka'idar
ga66ai a k'irge.
2.
Komai na shi da
lissafi yake tafe.
Haiku sai mai Mas.
3.
Duk wanda bai da
rumbun kalmomi to
na shi yai kallo.
4.
Dalili shi ne
nemawa kalma gurbi
da ma madadi.
5.
Don Hausa Haiku
sai fasihi na gaske
ke rubuta shi.
6.
Ban da ma'ana
ta kalmar akwai wasu
buk'atu daban.
7.
Wanda dole ne
su tabbata in har da
gaske za a yi.
8.
In kuwa zance
kawai za ai to akwai
adabin zube.
9.
Rarara kowa
yai. Amma kun ga ana
Haiku da wargi?
10.
wAllah ko gwanin
rubutacciyar wak'a
ko ko marera.
11.
Ba su tunkarar
Haiku da Hausa gaba
gad'i. Sam! Inaa!
12.
Shi ba a rera
shi balle a nemi sai
an k'afiye shi.
13.
Su 'Dango su
'Kwar duk ajje su. Samu
kalma ta dace.
14.
Ga66anta kar su
zarce kirgen bulo a
gina baitinka.
15.
Ban da d'aukar
kalma a ya6a. Lallai
ne sai ka k'irga.
16.
Hausa Haiku sam
ba fili ba ne awon
igiya. Lala!
17.
Awon Gwamnati
ne da duk takardunsa
har Satifiket.
18.
Shi ya sa Haiku
da Hausa sai gwanayen
jera kalmomi.
19.
Da ga6obi sha
bakwai cifcif kan sahu
uku bi da bi.
20.
Ga6o6i biyar
sama, bakwai a tsaka
biyar a k'asa.
21.
Sannan a nemi
ma'ana don kowa ya
gane sak'onka.
(c)2025 Tijjani M. M.
A Kiyayi Haƙƙin Mallaka
No comments:
Post a Comment